Geta stórkettir malað eins og venjulegir litlir kettir?

Svar

Allir kettir geta malað þar með talið þær tegundir sem teljast til stórkatta (Panthera sp.) og blettatígurinn (Acinonyx jubatus). Malið er enda eitt þeirra mörgu einkenna, og líklega það gleggsta, sem skilur kattadýr (Felidae) frá öðrum rándýrum (Carnivora).


Þetta karlljón er greinilega ekki í skapi til að mala en þegar lundin batnar heyrist kannski mal.
Þótt allir kettir mali þá virðist sem tegundir af ættkvísl smákatta (Felis-ættkvíslinni), að minnsta kosti þær sem búa í sambýli við manninn, mali meira en kettir annarra tegunda. Höfundur þessa svars hefur ekki upplýsingar um mal villtra katta af smákatta-ættkvíslinni og því er ekki hægt að segja til um hvort hið tíða mal heimiliskattarins (Felis catus) sé aðlögun að sambýli við manninn. Hugsanlega hafa kettir lært að mali þeirra fylgir oft vellíðan hjá eigandanum sem gerir sér þá far um að skapa þær aðstæður sem koma þeim til að mala. Ef svo er í pottinn búið er þetta ekki meðvitað hjá kettinum heldur frekar atferlisleg aðlögun að árþúsunda sambýli við mannskepnuna.

Það er fleira en tíðni malsins sem er ólík hjá smáköttum og hinum tveimur ættkvíslum katta (Panthera og Acinonyx). Venjulegur heimilisköttur malar bæði við innöndun og útöndun en svo virðist sem stórkettir geti aðeins malað við útöndun. Mal þeirra virðist því ekki gegna eins mikilvægu félagslegu hlutverki og meðal heimiliskatta.

Mynd: Africa Nature Photography - ljósmyndari Dries Cronje