Höfðu risaeðlur hamskipti, eins og snákar og eðlur í dag?

Svar

Hamskipti (e. moulting) nefnist það þegar dýr kasta af sér ysta lagi húðar. Slíkt er mjög algengt meðal dýra en tekur á sig mismunandi myndir. Fuglar fella fjaðrir, spendýr fara úr hárum, til dæmis kettir og hundar á vorin og haustin, og eðlur og snákar losa sig við ysta lag skinnsins.

Hamskipti hjá snákum eru líklega sýnilegustu og best þekktu hamskiptin meðal skriðdýra. Snákarnir skríða einfaldlega úr gamla hamnum og skilja hann eftir, líkt og þegar við förum úr sokkum. Ysta lagið eða hamurinn liggur þá eftir á jörðinni. Þar sem snákar eru algengir má víða sjá hami liggja á jörðinni. Hjá eðlum eru hamskiptin aðeins öðruvísi þar sem dautt ysta lag dýrsins molnar og fellur af.


Snákur fer úr hamnum.
Það er mjög líklegt að risaeðlur hafi haft einhvers konar hamskipti. Líffræðingar vita ekki fyrir víst hvernig hamskipti risaeðla eða annarra löngu horfinna skriðdýra fóru fram. Sennilega hefur það þó verið áþekkt því sem þekkist meðal eðla í dag, það er að skinnið hefur losnað af hægt og hægt og fallið til jarðar.

Frekari fróðleikur á Vísindavefnum:

• Hver eru helstu einkenni skriðdýra?
• Af hverju urðu risaeðlurnar svona stórar?
• Voru risaeðlur með heitt eða kalt blóð?
• Sváfu risaeðlur liggjandi eða standandi?

Mynd: Naked Science Forum. Sótt 16. 9. 2009.