Hvað eru um það bil margir kílómetrar frá Þorlákshöfn til Vestmannaeyja?

Svar

Með nútímatækni og þeim möguleikum sem Netið býður upp á er tiltölulega lítið mál að mæla fjarlægðir milli staða. Við áætlun vegalengda þarf hins vegar að athuga hvernig mælt er. Til dæmis stoðar lítið að vita hver loftlínan frá Reykjavík til Akureyrar er ef menn ætla að ferðast í bíl. Hún gagnast flugvélum þó vitanlega vel en samt sem áður fljúga þær ekki alltaf „stystu“ leiðina en það er annað mál.


Vestmannaeyjabær
Með kortavef Já.is við höndina er unnt að finna loftlínu milli staða og ef menn vanda sig vel mætti finna þokkalega nákvæman kílómetrafjölda milli staða þegar ekið er. Aftur á móti sýnir vefur Vegagerðarinnar nákvæmar tölur á milli fjölmargra staða.

Um það bil 72 kílómetrar eru á milli Þorlákshafnar og Vestmannaeyja í beinni loftlínu. Herjólfur fer aftur á móti örlítið lengri leið eða um 75 km. Með tilkomu Landeyjahafnar styttist sjóvegalengd á milli lands og Eyja töluvert eða niður í um 13 km. Á hinn bóginn eru 137 km frá Reykjavík til Landeyjahafnar en 51 km frá Reykjavík til Þorlákshafnar. Ferðalagið mun samt sem áður taka mun styttri tíma fyrir þá sem ferðast á milli Eyja og höfuðborgarsvæðisins þó heildarkílómetrafjöldinn verði meiri.

Frekara lesefni á Vísindavefnum:

• Hvað er langt milli Vopnafjarðar og Eyrarbakka upp á míkrómetra? eftir Þorstein Vilhjálmsson
• Hvað er langt á milli Egilsstaða og Reykjavíkur? eftir EDS
• Hve löng er loftlínan á milli Reykjavíkur og Egilsstaða annars vegar og Hafnar í Hornafirði og Egilsstaða hins vegar? eftir EDS

Heimildir og mynd:

• Já.is - kortavefur
• Eyjar.net
• Wikipedia.is - mynd. Sótt 6.7.2010.