Hvaðan koma flestir ferðamenn sem heimsækja Ísland?

Svar

Flestir ferðamenn sem koma til Ísland eru Bretar og á það við hvort sem ferðamenn skemmtiferðaskipa eru teknir með eða ekki.

Ferðaþjónusta hefur verið vaxandi atvinnugrein á Íslandi undanfarin ár og fjöldi þeirra sem heimsækja landið aukist verulega. Frá árinu 2002 hefur Ferðamálaráð og síðan Ferðamálastofa verið með talningar í Leifsstöð og niðurstöður þeirra eru birtar á vef Ferðamálastofu.


Árið 2008 voru erlendir gestir á Íslandi sem fóru um Leifsstöð 472.535 talsins.
Fyrsta heila árið sem Ferðamálastofa birti tölur um voru erlendir gestir sem fóru um Leifsstöð 308.768 en árið 2008 voru þeir 472.535. Skipting eftir þjóðernum var eftirfarandi:

Land	Fjöldi ferðamanna	Hlutfall
Bretland	69.936	15%
Þýskaland	45.111	10%
Danmörk	41.012	9%
Bandaríkin	40.491	9%
Noregur	35.121	7%
Svíþjóð	32.255	7%
Frakkland	26.161	6%
Pólland	24.226	5%
Holland	18.756	4%
Finnland	10.792	2%
Kanada	10.568	2%
Spánn	10.438	2%
Ítalía	10.113	2%
Sviss	7.134	2%
Japan	6.716	1%
Kína	5.759	1%
Annað	77.946	16%
Samtals	472.535	100%

Hér má sjá að Bretar eru hlutfallslega fjölmennasti hópurinn sem heimsækir Ísland og hefur svo verið öll árin sem talningin nær yfir. Þjóðverjar koma þar á eftir og síðan Danir og Bandaríkjamenn. Það sem helst hefur breyst frá 2003 er það að hlutfall Bandaríkjamanna hefur dregist nokkuð saman, þeir voru 15% allra gesta sem fóru um Leifsstöð 2003 en 9% árið 2008. Á sama tíma hefur hlutfall þeirra sem lenda í flokknum “Annað” vaxið úr 11% í 16%.

Rétt er að taka fram að áætlað er að þessar tölur nái yfir 96% erlendra gesta sem koma til landsins en um 4% ferðamanna komi um aðra flugvelli, með Norrænu og öðrum skipum.


Á hverju ári heimsækja fjölmargir farþegar skemmtiferðaskipa landið en þeir eru oft ekki taldir með þegar fjallað er um fjölda ferðamanna enda stoppa þeir ekki nema nokkra klukkutíma á hverjum stað og gista ekki á landinu.
Inn í þessum tölum eru heldur ekki farþegar skemmtiferðaskipa sem hafa stutta viðdvöl í hverri höfn og gista ekki á landinu. Hins vegar er fjöldi þeirra töluverður og hefur farið vaxandi eins og fjöldi þeirra sem koma til landsins á annan hátt. Á vef Hagstofunnar fundust tölur um fjölda ferðamanna á skemmtiferðaskipum sem heimsóttu Ísland árið 2007 og voru þeir rétt rúmlega 53.000. Skipting á milli landa er töluvert frábrugðin því sem er hjá flugfarþegunum þar sem yfir 80% farþega skemmtiferðaskipa árið 2007 voru frá þremur löndum; Þýskalandi (38,5%), Bretlandi (32,3%) og Bandaríkjunum (10,3%).

Heimildir og myndir:

• Ferðamálastofa. Skoðað 23. 6. 2009.
• Hagstofa Íslands. Skoðað 23. 6. 2009.
• Mynd frá Leifsstöð: Samtök ferðaþjónustunnar. Sótt 23. 6. 2009
• Mynd af skemmtiferðaskipi: Skarpur.is. Sótt 23. 6. 2009.