Hvað eru margir ísbirnir á Grænlandi?

Svar

Árið 1993 var heildarstofnstærð hvítabjarna (Ursus maritimus) talin vera á bilinu 21.470-28.370 dýr og bendir allt til þess að stofninn hafi haldist nokkuð stöðugur síðan.


Birna með hún.
Hvítabjörnum er skipt niður í nokkra aðskilda stofna sem halda til allt í kringum norðurpólinn. Flestir fræðimenn telja þessa stofna vera sex talsins:

• Chucki-stofninn sem heldur til frá Wrangler-eyju við Síberíu og allt austur til vestasta odda Alaska.
• Beauford-stofninn sem heldur til í norður Alaska og nyrst við meginland Kanada.
• Kanada-eyjastofninn sem heldur til við kanadísku heimskautaeyjurnar.
• Grænlands-stofninn.
• Mið-Síberíustofninn.
• Svalbarða-stofninn sem heldur einnig til við Franz Jósefsland og á nærliggjandi svæði.

Flestir hvítabirnir lifa í Kanada en talið er að um 15 þúsund dýr eða ríflega 60% af öllum hvítabjörnum í heiminum séu á kanadísku landsvæði.

Aðal útbreiðslusvæði hvítabjarna á Grænlandi er á norðvestur- og norðausturhluta eyjunnar. Talið er að heildarstofnstærð hvítabjarna á Grænlandi sé á bilinu 4.000 - 5.500 dýr. Ísbirnir frá Grænlandi halda einnig mikið til á Baffinsvæðinu í Kanada og á Ellismere-eyju.

Heimildir og mynd:

• Prokosch, P. 1994. How Many Polar Bears? WWF Arctic Bulletin. 3:94. bls. 13.
• Servheen, C. 1990. The Status and Conservation of the Bears of the World. International Conference on Bear Research and Management Monograph Series No. 2.
• Nowak, R. 1999. Walker's Mammals of the World. Baltimore and London: The Johns Hopkins University Press.
• Environment News Service