Hvers konar ritmál er silfurstíll?

Svar

Fyrir rúmum tuttugu árum var spurt um orðið silfurstíll í þáttum Orðabókar Háskólans um íslenskt mál en orðið virtist ekki koma fyrir í orðabókum. Allnokkur svör bárust og bar heimildarmönnum saman um að orðið væri notað um ákveðið prentletur. Margir nefndu að afar þeirra og ömmur hefðu lært að lesa á bókum prentuðum með silfurstíl á síðasta fjórðungi 19. aldar.

Svo virðist sem í þýsku hafi verið til orðið Silberschrift um smágert prentletur sem tekið hafi verið upp í dönsku sølvskrift og er hugsanlega fyrirmynd íslenska orðsins að einhverju leyti.

Upprunalega spurningin hljóðaði svona:

Ég hef heyrt um gamalt ritmál sem kallast silfurstíll. Hvað getið þið sagt mér um það?