Hvaða reglur gilda um greiningu atkvæða í íslenskum orðum?

Svar

Atkvæði í íslensku inniheldur alltaf eitt sérhljóð og getur að auki haft eitt eða fleiri samhljóð. Eiginlega er atkvæði framburðareining og ef orð er borið fram hægt og skýrt heyrist venjulega hvar atkvæðaskilin eru. Dæmi um orð skipt í atkvæði þar sem bandstrikið sýnir skilin:

á, áll, hlust
ká-pa, slak-na, ges-tur
ves-al-ing-ur, verð-ból-ga

Skipting orðs í atkvæði og skipting orðs milli lína þarf ekki að vera hin sama. Orðunum í fyrstu línunni er ekki hægt að skipta milli lína. Orðunum kápa og slakna er ekki skipt milli lína en gestur skiptist gest-ur. Vesalingur skiptist milli lína ves-alingur, vesal-ingur, vesaling-ur og verðbólga skiptist í verð-bólga.

Frekara lesefni:

• Hvað eru að jafnaði mörg atkvæði í orði í íslensku ritmáli?