Geta fiskar lifað í geimnum?

Svar

Geimfiskur.

Óvarðir og án útbúnaðar geta fiskar ekki lifað í geimnum, ekki frekar en menn. Fiskar draga súrefni úr vatni og það er ekkert vatn úti í geimnum. Jafnvel þótt fiskurinn fengi vatnsskál festa á hausinn á sér, eins og geimfarar eru með hjálma, myndi hinn lági þrýstingur í geimnum örugglega drepa hann. Í þessu samhengi má benda á svar við spurningunni Hvað yrði fyrst til að drepa óvarinn mann úti í geimnum?

En dýr, rétt eins og menn, geta lifað úti í geim við réttar aðstæður. Ýmiss konar dýr hafa verið send út í geiminn, fyrst án manna á meðan verið var að kanna hvort óhætt væri að senda lífverur út í geim. Eftir að mannaðar geimferðir hófust hafa dýr áfram farið með í því skyni að gera á þeim ýmiss konar rannsóknir. Fiskar fóru í fyrsta skipti út í geiminn árið 1973 en þeir voru af tegund sem á ensku kallast mummichog (Fundulus heteroclitus). Síðan hafa fiskar af fleiri tegundum fylgt í kjölfarið.

Heimildir og mynd:

• A Brief History of Animals in Space á NASA
• Top 10 Animal Astronauts á Toptenz.net.
• Animals in space á Wikipedia.
• Mynd: Original Buzz. Sótt 15. 6. 2012.

---

Þetta svar er eftir nemendur í Háskóla unga fólksins, námskeiðum á vegum HÍ fyrir 12-16 ára ungmenni í júnímánuði 2012.