Hvenær gýs Geysir aftur?

Svar

Þegar Geysir var upp á sitt besta um og uppúr miðri tuttugustu öld gaus hann af sjálfsdáðum jafnvel nokkrum sinnum á dag. Síðan hætti hann því og þá þurfti að örva hann sérstaklega með sápu. Slíkt er auðvitað óæskilegt til lengdar og gos lágu því niðri um allnokkurt skeið.

Fyrir 5-10 árum var aftur farið að láta Geysi gjósa með sápu nokkrum sinnum á hverju sumri og við vitum ekki betur en slíkt sé enn gert.

Goshverir, venjulegir hverir og laugar eru fyrirbæri sem geta hæglega breyst af litlu tilefni. Breytingar geta til dæmis orðið vegna útfellinga, það er að segja fastra efna sem falla út úr vatninu og breyta vatnsrásunum eða loka þeim jafnvel alveg. Jarðskjálftar geta líka breytt hverum og jarðhita verulega og eru nokkur dæmi um það úr skjálftunum sem urðu á Suðurlandi sumarið 2000. Ýmis fleiri atriði geta haft áhrif á hveri.

Framtíð Geysis og annarra goshvera er því engan veginn fyrirfram gefin. Við getum þó fullyrt að hverasvæðið í Haukadal, þar sem Geysir er, mun ekki hverfa sem slíkt á skömmum tíma eða fyrirvaralaust. Hins vegar eru sífellt að verða til nýir hverir á svæðinu og aðrir að sofna eða hverfa.