Af hverju er fólk loðið undir höndunum?

Svar

Á kynþroskaskeiði verða miklar breytingar á líkömum bæði pilta og stúlkna. Brjóst og mjaðmir stúlkna stækka og þær byrja á blæðingum, röddin dýpkar hjá báðum kynjum, þó meira hjá piltum en stúlkum, kynfæri þroskast og piltar fara að geta fengið sáðlát, og líkaminn stækkar hratt.

Bæði kyn fá einnig hár á ýmsa staði þar sem ekki var mikill hárvöxtur fyrir. Piltar fá skegg og bringuhár og verða oft loðnir á hand- og fótleggjum. Bæði piltar og stúlkur fá svo hár kringum kynfæri og undir höndum.

Karlhormón ráða því að hár vex undir höndum fólks. Á kynþroskaskeiði fara eistu pilta að framleiða mikið magn af karlhormónum. Hjá báðum kynjum taka nýrnahetturnar einnig til við að framleiða karlhormón í allnokkru magni, nógu miklu til að koma af stað hárvexti undir höndum hjá bæði piltum og stúlkum.

Frekara lesefni á Vísindavefnum

• Af hverju vex skegg á fólki? Og hvernig virkar það? eftir HMS.
• Af hverju vex hárið? eftir EMB.

Heimildir og mynd

• Androgen. Encyclopædia Britannica Online.
• Hair. Encyclopædia Britannica Online.
• Puberty. Encyclopædia Britannica Online.
• Underarm hair. Wikipedia: The free encyclopedia.
• Myndin er fengin af síðunni Embroidery and Beadwork by Mary Yaeger.