Sólin
Rís 05:19 • sest 21:35
Tunglið
Rís 25:18 • Sest 04:56
Flóð
Árdegis: 07:07 • Síðdegis: 19:24
Fjara
Árdegis: 01:08 • Síðdegis: 13:14
Dýpi Íshafsins á norðurpólnum er um 4130 m. Þessi tala segir okkur að mikið dýpi sé undir hafísnum þar en hún segir hins vegar ekki margt um botnlögun Norður-Íshafsins. Upplýsingar um dýpi í Norður-Íshafi hafa smám saman safnast saman, frá ísbrjótum sem og öðrum skipum og frá mælingum sem gerðar eru frá íseyjum.
Árið 1979 var gefið út dýptarkort sem sýndi að Norður-Íshafið er mjög misdjúpt. Þar eru víðáttumikil landgrunnssvæði en einnig tvö mikil djúp, Kanadadjúp og Evrasíudjúp. Jafnframt kom þar fram að háir fjallgarðar skipta djúpunum.
Á síðustu árum hefur mikið bæst við af mælingum til kortlagningar. Meðal annars var leynd létt af mælingum sem gerðar höfðu verið frá breskum og bandarískum kafbátum 1958-1988. Á grundvelli tiltækrar vitneskju birti sænskur jarðfræðingur, Martin Jakobsson, og samstarfsmenn hans nýtt kort snemma á þessu ári um lögun hafsbotns og þurrlendis á norðurslóðum. Það kort er mun nákvæmara en kortið frá 1979 og sýnir að norðurpóllinn er í Evrasíudjúpi við rætur Lomonosov-hryggjar og dýpið 4130 m er fengið úr sama gagnasafni og kortið er unnið úr. Þetta nýja kort verður lagt til grundvallar við frekari rannsóknir í Íshafinu, til dæmis á djúpstraumum, á seti djúpanna og á fjallgörðunum háu.
Frekara lesefni á Vísindavefnum:- Hvaða heimsálfu tilheyrir norðurpóllinn? eftir Emilíu Dagnýju Sveinbjörnsdóttur
- Hvernig er veðurfar á norðurpólnum og hvers vegna er þar svona mikill ís? eftir Harald Ólafsson
- Hvað er langt þangað til ísinn á Norðurpólnum bráðnar? eftir EDS
- Á þessari síðu má finna umfjölllun um sjávarbotninn í Íshafinu auk mynda.
- Á eftirfarandi síðu má finna stærri og skýrari útgáfu af myndinni hér til hliðar, með skýringartexta á ensku: http://www.ngdc.noaa.gov/mgg/image/IBCAO_betamap.jpg
