Hvers vegna eru hundar með fleiri litninga en menn? Hefur það eitthvað með gáfur og eiginleika að gera?

Svar

Hundar hafa 78 litninga í líkamsfrumum sínum en menn aðeins 46. Litningar hunda eru hins vegar minni en litningar manna og líklegt er að álíka mörg gen séu í erfðaefni þessara tegunda. Meirihluti gena hundsins á sér eflaust samsvörun í erfðaefni mannsins en röðun þeirra í litninga er ólík. Það er vel þekkt úr erfðafræði og þróunarsögu að tilfærsla verði á erfðaefni með þeim afleiðingum að litningum fækki eða fjölgi án þess að gen týnist eða þeim fjölgi. Afar ólíklegt er að nein bein tengsl séu á milli fjölda litninga hjá ólíkum hryggdýrategundum og sérstakra eiginleika eins og til dæmis greindar. Enn vitum við reyndar ósköp lítið um stjórnun gena á greind dýra og manna. Það er viðfangsefni sem bíður vísindamanna 21. aldarinnar.



Sjá einnig eftirfarandi svör um hunda:

• Geta úlfar og hundar eignast afkvæmi og skiptir máli hvaða hundategundir eru þar að verki?
• Af hverju eru hundar stundum grimmir og stundum góðir?
• Hvert er latneska heitið á íslenska fjárhundinum?
• Hver er árásargjarnastur hunda?