Höfn og Stykkishólmur eru lögð af stað með Háskólalestinni

Fyrstu skólarnir sem taka þátt í Háskólalestinni eru byrjaðir að vinna með Vísindavefnum. Í síðustu viku sendu nemendur í Grunnskóla Hornafjarðar og Grunnskólanum Stykkishólmi inn fjölda spurninga sem starfsfólk Vísindavefsins svaraði því sem næst samstundis. Björn Sigfinnsson kennari á Hornafirði og Elísabet Valdimarsdóttir kennari í Stykkishólmi sáu um allan undirbúning fyrir hönd sinna skóla.

Spurningar nemendanna voru afar fjölbreyttar og báru augljósan vott um áhuga og skilning þeirra á vísindum. Margir vildu fræðast um málefni líðandi stundar, svo sem um hvernig flóðbylgjur verða til, um jarðskjálfta og orsakir þeirra, geislavirkni, kjarnorku og loftslagsbreytingar.

Einnig voru nemendurnir að velta fyrir sér sígildum spurningum um stærð og lögun alheimsins, um svarthol, líf á öðrum hnöttum og hvort hægt væri að endurlífga risaeðlur og loðfíla?

Þá spurðu þau líka um það hvort kettir gætu kafað, af hverju sumir væru heimskir en aðrir snjallir, af hverju mennirnir væru að mestu úr vatni, hvort við hefðum getað borðað risaeðlukjöt, og af hverju menn tala eins og teiknimyndapersónur ef þeir anda að sér helíni?

Hægt er að skoða öll svör við spurningum nemendanna í flokkunum sem sveitarfélögin Höfn og Stykkishólmur eiga, ásamt grunnskólunum þar.

Nemendur í Grunnskólanum Stykkishólmi hafa nú sett saman vefnámskeið sem bera nöfnin: Kettir, Sandur og Kynlíf. Nemendur í Grunnskóla Hornafjarðar hafa gert slíkt hið sama en vefnámskeið þeirra heita: Vatnajökull, Fjöll og Hreindýr. Næstu verkefni krakkanna verða svo að setja inn myndbönd eða hlaðvarp.