Í hvaða löndum búa leðurblökur?

Nafn þitt

Netfang þitt

Netfang móttakanda

Ruslpóstvörn =

Svar

Í hvaða löndum búa leðurblökur?
Leðurblökur (Chiroptera) eru tegundaauðugasti ættbálkur spendýra á eftir nagdýrum. Til ættbálks leðurblaka teljast um 1.200 tegundir eða liðlega 20% allra spendýrategunda. Leðurblökur finnast í öllum heimsálfunum að Suðurskautslandinu undanskildu.

Tegundafjölbreytnin er langmest á regnskógarsvæðunum, í Suður-Ameríku, Afríku og Asíu, en minnkar í réttu hlutfalli við aukna fjarlægð frá regnskógum. Höfundur hefur ekki upplýsingar um fjölda tegunda sem finnast á þessum svæðum en sem dæmi má taka að á takmörkuðu regnskógasvæði í Vestur-Afríku eru þekktar 97 tegundir. Til samanburðar þá eru þekktar 47 tegundir í Bandaríkjunum og 45 tegundir í Evrópu.

Sú tegund í Evrópu sem teygir sig nyrst er norræna blakan (Eptesicus nilssonii). Vitað er til þess að hún hafi átt unga í Finnmörku, nærri 68-70°N. Það eru nyrstu mörk útbreiðslu hennar. Að auki hefur norræna blakan mesta útbreiðslu leðurblaka, hún finnst allt frá Bretlandseyjum í vestri austur til Hokkaido-eyju í Japan.

Leðurblökur lifa ekki á Íslandi, Færeyjum, Grænlandi og öðrum norðlægum og suðlægum eyjum. Þær lifa heldur ekki á túndrusvæðum Norður-Ameríku og Evrasíu.

Heimildir og mynd:

• Stebbings, R. E. og Griffith, Francesca. Distribution and status of bats in Europe. Abbots Ripton, Huntingdon, Institute of Terrestrial Ecology, 1986.
• Rydell, J., Strann, K-B. og Speakman J. R. First record of breeding bats above the Arctic Circle: northern bats at 68-70°N in Norway. Journal of Zoology (1994) 233, 335-339.
• Kort: Bat range.png - Wikimedia Commons Sótt 16. 04. 2020.

...